સમજી જા – સંજુ વાળા
તક નિરાળી મળી છે સમજી જા
રમ્ય ક્ષણ સાંપડી છે સમજી જા
વૃત્તિ તો વાંઝણી છે સમજી જા
પીડ એની જણી છે સમજી જા
સૌ ચળકતાં ચટા-પટા, ટપકાં
ક્ષણજીવી કાંચળી છે સમજી જા
સ્ફોટ શું એ તને ખબર ક્યાં છે ?
જાત દીવાસળી છે સમજી જા
શક્ય છે પળમાં થંભી જાય હવે
તર્ક તો વા-ઝડી છે સમજી જા
તારા નખ પર છે ડાઘ એના હજુ
લાગણી કોઈ ખણી છે સમજી જા
માત્ર મુઠ્ઠી જુવારના માલિક !
એની તો વાવણી છે સમજી જા.
– સંજુ વાળા
ભાવક પાસે ઉચ્ચ કક્ષાની સજ્જતાની વણકથી ‘ડિમાન્ડ’ કરતા સંજુ વાળા પાસેથી પ્રથમ પ્રયાસે ઉઘડી જાય એવી રચના મળે એ ફેબ્રુઆરીના ઓગણત્રીસમા દિવસ જેવી ઘટના છે. પણ આ સંજુ વાળાની રચના છે. સરળ અને સહજ લાગતા શેરમાં પણ ઊંડે ઊતરી શોધશો તો છીપમાંના મોતી જેવો ખજાનો જડશે એની ગેરંટી.
નિનાદ અધ્યારુ said,
May 12, 2016 @ 1:57 AM
સ્ફોટ શું એ તને ખબર ક્યાં છે ?
જાત દીવાસળી છે સમજી જા.
સ્ફોટ …!
મીના છેડા said,
May 12, 2016 @ 2:54 AM
તારા નખ પર છે ડાઘ એના હજુ
લાગણી કોઈ ખણી છે સમજી જા… ક્યા બાત
KETAN YAJNIK said,
May 12, 2016 @ 8:15 AM
કયા શેર પર અટકું અને આગળ વ્ધુએની જ સમજ ન પડી। દરેક પંક્તિએ પાંખડીઓ ખુલતી ગઈ અને મધુકર મુક્ત થતો ગયો
ભરત ત્રિવેદી said,
May 12, 2016 @ 9:07 AM
વૃત્તિ તો વાંઝણી છે સમજી જા
પીડ એની જણી છે સમજી જા
ક્યા બાત !
Devika Dhruva said,
May 12, 2016 @ 9:41 AM
ઓહોહોહો…અદભૂત…અદભૂત. સલામ સાહેબ!!
Yogesh Shukla said,
May 12, 2016 @ 1:23 PM
કવિ શ્રી એક એક પંક્તિ માં ગુઢ અર્થ સાથેની રચના ,
ઈર્શાદ કવિ શ્રી ,
Maheshchandra Naik said,
May 12, 2016 @ 5:45 PM
અભિનંદન,શ્રી સંજુવાળા,સરસ ગઝલ ……..
આભાર ડો. શ્રી વિવેક્ભાઈ……….
Sanju Vala said,
May 13, 2016 @ 12:35 AM
મિત્ર.. ધવલજી અને સૌ મિત્રોનો ખૂબ ખૂબ આભાર
La' Kant Thakkar said,
May 14, 2016 @ 7:21 AM
“…સ્ફોટ શું એ તને ખબર ક્યાં છે ?
જાત દીવાસળી છે સમજી જા…”
સાચી વાત પેટ્રોલ જેવું શ્વેત રક્ત જેની નસોમાં વહેતું હોય એવા કવિ !
જે કલ્પિત ‘ રમ્ય-ઘોષા ‘ પ્રિયાના નખ પર ડાઘ , તણખાનો હોય તેનો
સ્પર્શ માત્ર ભૂકંપો નાં પરિણામ સએજી શકે ને?
વાહ સંજુભા ! અભિનંદન .
-લા’કાન્ત ‘કંઈક’/ ૧૪.૫.૧૬