હું મારા શ્વાસ જેમને સમજી રહ્યો હતો,
‘ઘાયલ’ એ શ્વાસ મોતનાં ફરમાન નીકળ્યાં.
અમૃત ઘાયલ

ગઝલ – હેમેન શાહ

પંખી પાસે આવ્યું બોલ્યું કાનમાં
આ ઋતુ આવી તમારા માનમાં.

પૃથ્વીએ પડકાર વાદળને કર્યો,
પાણી હો તો આવી જા મેદાનમાં.

ખીલવાનો કૈં નશો એવો હતો,
પાંદડાં ખરતાં, ન આવ્યા ધ્યાનમાં !

સત્ય ક્યાં છે એક સ્થળ પર કે સતત ?
ઓસ વેરાયું બધે ઉદ્યાનમાં.

કિમતી પળ આપીને સોદો કર્યો,
હું કમાયો પણ રહ્યો નુકસાનમાં !

સાબિતી કે તારણોમાં શું મળે ?
જો હશે તો એ હશે અનુમાનમાં.

મોંઘી ને રંગીન કંઈ ચીજો હતી
માત્ર મેં કક્કો લીધો સામાનમાં !

– હેમેન શાહ

ગઝલનો પહેલો જ શેર પહેલી બોલ પરના છગ્ગા જેવો. જો કે ખીલવાના નશાની વાત અને કિમતી પળોના સોદાની વાત બધામાં શિરમોર છે.

4 Comments »

  1. mitul thaker said,

    February 21, 2015 @ 3:18 AM

    મસ્ત

  2. ધવલ said,

    February 21, 2015 @ 10:04 AM

    પંખી પાસે આવ્યું બોલ્યું કાનમાં
    આ ઋતુ આવી તમારા માનમાં.

    – વાહ !

  3. yogesh shukla said,

    February 22, 2015 @ 9:56 PM

    રચના વાંચવાની મજા આવી

  4. Pravin Shah said,

    March 2, 2015 @ 5:05 AM

    સુંદર રચના, હેમેનભાઇ ….

RSS feed for comments on this post · TrackBack URI

Leave a Comment