(ત્રિપદી હાઈકુ ગઝલ) – મનોજ ખંડેરિયા
ટપકે નેવાં
આજે તો અવકાશે
છલકે નેવાં
રાત પડે ને
સામે ઘેર જવાને
સરકે નેવાં
કોણ આવતું
આજ આંખની જેવાં
ફરકે નેવાં
અષાઢ-રાતે
કણું બનીને આંખે
ખટકે નેવાં
પાંખ-પાંખમાં
મૌન ધ્રૂજતું ભીનું
ધબકે નેવાં
– મનોજ ખંડેરિયા
અનન્ય કહી શકાય એવી આ રચનાને આપણે શું કહીશું?
હાઈકુ શ્રેણી? ગઝલ? કે પછી ત્રિપદી ?
અહીં ગઝલનો છંદ યથાર્થ પ્રયોજાયો છે, નેવાં રદીફ અને ટપકે-છલકે-સરકે-ફરકે-ખટકે-ધબકે જેવા કાફિયા પણ સફળતાપૂર્વક પ્રયોજાયા છે. શેરિયત જળવાય રહે છે પણ ઉલા મિસરા અને સાની મિસરા એમ ગઝલમાં બે પંક્તિઓ મળીને એક શેર બને એ રચના અહીં નજરે ચડતી નથી. અહીં ત્રિપદીની માફક ત્રણ પંક્તિઓની સંરચના નજરે ચડે છે પણ કવિતાનો ઘાટ વળી હાઈકુનો થયો છે.
આને ત્રિપદી હાઈકુ ગઝલ કહીશું? કે પછી રંગ-રૂપની પળોજણ છોડીને કવિતાને જ મનભર માણીશું?
Kalpana said,
September 7, 2011 @ 4:05 AM
આ જે નાના પદોમા નેવાની વાત ગમી. નીતરે ત્યારે જ નેવા તરફ ધ્યાન જતું હોય છે. એની નીચે કવિએ કલ્પનાનો હાથ ધરી સુન્દર રચના આપણા હાથમા મૂકી છે.
આભાર.
કિરણસિંહ ચૌહાણ said,
September 7, 2011 @ 7:25 AM
આને બહુ જ સાહજિકતાથી થયેલો મીઠો પ્રયોગ કહી શકાય કે જેને મનોજભાઇ જેવા શબ્દશિલ્પી જ કંડારી શકે. ત્રણ–ત્રણ સ્વરૂપ એક સાથે નિભાવવા અને એય જરાય રસક્ષતિ વગર…!! વાહ મનોજભાઇ!
kishoremodi said,
September 7, 2011 @ 8:17 AM
સરસ પ્રયોગ છે
kishoremodi said,
September 7, 2011 @ 3:29 PM
સુંદર પ્રયોગાત્મક ત્રિપદી ગઝલ.
Dhruti Modi said,
September 7, 2011 @ 3:32 PM
ઉપરની કોમેન્ટ મારી ઍટલે કે ધૃતિ મોદીની છે.
Devika Dhruva said,
September 7, 2011 @ 7:02 PM
નેવાં જોઇને કાવ્યત્વથી ભરપૂર રચના તો સાચા કવિઓ જ કરી શકે અને એટલે જ તો….
શબ્દશિલ્પીના, આ આજે પણ હજી, રણકે નેવા.
ત્રિપદી હાઇકુ ગઝલ ખુબ ગમી.શોધીને લઇ આવવા બદલ વિવેકભાઇને અભિનંદન અને આભાર.
Raj Mheta said,
September 8, 2011 @ 11:02 PM
kishoremodi said,
September 7, 2011 @ 8:17 am
સરસ પ્રયોગ
ભાઈ શ્રેી, પણ તમે આ પ્રયોગ ન કરતા!
જગદીશ કરંગીયા ‘સમય’ said,
June 9, 2017 @ 6:13 AM
ત્રિપદી હાઇકુ ગઝલ ખુબ ગમી.
આવું સાહસ કરવું પણ પ્રશંસાને પાત્ર છે.
આભાર.
જય ભારત
—————
Jagdish Karangiya ‘Samay’
https://jagdishkarangiya.wordpress.com