છેટું એક જ વેત !! -નિનાદ અધ્યારુ
એને માટે એજ છે અક્ષર, એજ છે એની ગીતા,
કોરે-કોરી પાટી ઉપર શૈશવ પાડે લીટા !
ચાર પગે એ ચાલે તોયે અંતર કાપે લાખ,
ચાંદામામાને ઓળખતી એની દુધિયા આંખ !
બોખું-બોખું હસતો ચહેરો કરતું અઘરા યોગ,
ફળિયાના ક્યારાની માટી એના છપ્પન ભોગ !
ચોટી એવી વાળેલી કે જાણે કોઈ તાજ,
બાળારાજા રડી-રડીને કરતું ઘરમાં રાજ !
એનો કક્કો સમજે એવો ક્યાં કોઈ ભડવીર !
ઊકેલો તો લાગે જાણે અંધારામાં તીર !!
રંગબેરંગી રમક્ક્ડાઓ એની મોટી ફોજ,
ટોટીવાળી દૂધની બોટલ બે ટાણાની લોજ !
માના હાલરડાંથી ઝરતું હરિ સમું શું હેત !
ઈશ્વરના બે રૂપ મળે છે, છેટું એક જ વેત !!
-નિનાદ અધ્યારુ
બાળગીતાના સહજ અધ્યાય સમા દોહા લઈ આવતા આ કવિને કયા શબ્દોમાં વખાણવા ?
Rajnikant Vyas said,
January 17, 2015 @ 4:15 AM
બાળ સહજ ક્રિયાઓને કવિએ બાખૂબીથી કાવ્યમા વણી લીધી છે.
Harshad said,
January 17, 2015 @ 1:35 PM
બહૂત ખૂબ. very nice and really touched me and took me to my childhood.
Jayshree said,
January 17, 2015 @ 2:13 PM
આને સ્વરબધ્ધ કરી હોય તો મઝા આવી જાય…
Shah Pravinachandra Kasturchand said,
January 17, 2015 @ 2:58 PM
મોટપણે નાનપણમાં સરકવું અને તે પણ બાળસહજતાથી
એ મુશ્કેલતો નહીં અને સરળ પણ નહીં.
નિનાદ અધ્યારુ માટેતો જરા પણ અઘરું ના હોય.
મારા મનમાં ઊઠે કેવો આ અનહદનો આહ્લાદ?
બાકી તો કૂવામાં સરક્યો’તો કોકિલ કેરો સાદ્.
Sudhir Patel said,
January 18, 2015 @ 11:27 PM
સુંદર દોહા-કવિતા!
KETAN YAJNIK said,
January 17, 2017 @ 12:04 AM
બુઝુર્ગની બાળકવિતા નો નાદ