………અભરખા નીકળે – હર્ષ બ્રહ્મભટ્ટ
એ જ બસ વર્ષો જૂના દિલના અભરખા નીકળે,
રણ પછી જંગલ પછી તો કૈંક દરિયા નીકળે.
કોઈ નાના સ્ટેશનેથી ટ્રેન ધસમસતી જતી,
રાત આખી એટલું છેટેથી સપનાં નીકળે.
દોસ્તો, આ શ્વાસના નામે ઉચાળા ઓડના,
પોટલું છોડો તો બસ બે-ચાર વગડા નીકળે.
દૂર આકાશે અડોઅડ બારણું એનું પડે,
આપણાં સગપણ હવે કોઈ એવા ઘરનાં નીકળે.
એ ક્ષણ લાગે શ્હેર આખ્ખું ભુલકણું થઈ ગયું,
જે ક્ષણે આ શ્હેરના સંબંધ ખપના નીકળે.
બેઉ બાજુ હરપળે અડકે છે લોલકની અણી,
રાતના ઘડિયાળના આ શ્વાસ પડખા નીકળે.
કોઈ નહીં આવે હું માની આંખ મીંચી દઉં અને,
પોપચે કોઈનાં ભીનાં ભીનાં પગલાં નીકળે.
.
- હર્ષ બ્રહ્મભટ્ટ
Jaffer Kassam said,
January 16, 2019 @ 8:02 AM
કોઈ નહીં આવે હું માની આંખ મીંચી દઉં અને,
પોપચે કોઈનાં ભીનાં ભીનાં પગલાં નીકળે.
pragnaju said,
January 16, 2019 @ 9:45 AM
‘…વર્ષો જૂના દિલના અભરખા નીકળે,’ અને એવું પણ નહિ કે ઉંમરના પ્રમાણમાં જ અભરખા આવે, અભરખાને ઉંમર સાથે કોઈ લેવા દેવા નહિ એના કોઈ રૂપ નહિ, એના કોઈ રંગ નહિ, ને એના કોઈ સ્વાદ નહિ! … જેમ ચુલામાંથી ધૂમાડા નીકળે એમ એના અભરખા નીકળે!
‘ … એટલું છેટેથી સપનાં નીકળે.’ અભરખો બુલેટ ટ્રેન આવવાથી ખૂબ રાજી .. જેવી ટ્રેન શરૂ થાય કે તેણે પાસ કઢાવી લેવો છે!
ભવ ભવ આવાં આકરાં રે અમને જોબન ફળજો !
કેવા જીવ્યાના અભરખા રે હતા કોમળ કોમળ !
જે અભરખા વગરનો અને પગરખા હોય એ સાધુ છે.
‘પોપચે કોઈનાં ભીનાં ભીનાં પગલાં નીકળે.’કવિશ્રી હર્ષ બ્રહ્મભટ્ટની આપણે સૌએ અનુભવેલી વાત.
ketan yajnik said,
January 16, 2019 @ 1:11 PM
અભરખાના અનેક અર્થ ઇચ્છા, ઉમેદ, ઓરિયો. હોંશ, ઉમળકો. તીવ્ર લાલસા,અબળખો;ઓરિયો , દોહદ.અભરખો હોવો જોઈએ. શું કામ ના હોવો જોઈએ…? એ જ તો માણસની ટેક્ષ વગરની મૂડી છે.
એ ક્ષણ લાગે શ્હેર આખ્ખું ભુલકણું થઈ ગયું,
જે ક્ષણે આ શ્હેરના સંબંધ ખપના નીકળે. પણ એવા અભરખા ના રખાય કે, શરીર આખું ઉઘાડું હોય અને માથે કાશ્મીરી ટોપી હોય.
Vanashaa said,
January 18, 2019 @ 1:58 AM
Rate This
ખીંટીએ ઓઢણીને પૂછ્યું કે; ક્યાં હાલ્યા ?
ઓઢણીએ કીધું કે : ઊડવા…
ખીંટી બોલી કે તને અધવચ્ચે ઝાલશું
તો ઓઢણી ક્યે: હવે ઝાલ્યો, ઝાલ્યો !
ઓરડાએ કીધું : અલી, મારી મરજાદ રાખ
હું તને કઇ પા-થી સાલ્યો ?
ના, નહીં જાવા દઉં… ના, નહીં – એમ કહી હીંચકાએ માંડ્યું કિચૂડવા
ઊંબર બોલ્યો કે : હું તો આડો નડીશ,
તયેં ઓઢણી બોલી કે : તને ઠેકશું,
ફળિયું ક્યે : અરરર, તો ઓઢણી ક્યે: મર્ર,
તને પાંચીકા જેમ ક્યાંક ફેંકશું
વાયરાએ કીધું કે : હાલ્ય બાઇ, ચોંપ રાખ્ય, અમે તને નહીં દૈયેં બૂડવા
ખીંટીએ ઓઢણીને પૂછ્યું કે: ક્યાં હાલ્યા?
ઓઢણીએ કીધું કે: ઊડવા…
– રમેશ પારેખ
ઉંમર સાથે અભરખા બદલાતા હશે ?
જુવાનીની અણસમજ અને ઉતાવળાપણુ પચાસ અને સાઠ પછી પણ વ્યક્તિમાં જોવા મળતું હશે?