મહોબ્બત પ્રથમ ધર્મ છે જિંદગીનો, મહોબ્બત વિના કોઈ આરો ન આવે,
સતત ચાલવું જોઈએ એ દિશામાં, જો થાકી ગયા તો ઉતારો ન આવે.
ગની દહીંવાળા

ગઝલ – દિલીપ રાવલ

હોઠોના સ્મિત સાથે આંખોમાં છે તળાવો,
તારામાં તારી સાથે કંઈ કેટલા બનાવો.

ના કંઈ નવું નથી અહીં, છે એના એ બનાવો,
ઇચ્છાના વૃક્ષ કાપો, ઇચ્છાના વૃક્ષ વાવો.

સૂરજનું અસ્ત થાવું કોઈ તળાવ વચ્ચે,
હો સ્વપ્ન છો ને કિંતુ એક સાંજ ત્યાં વિતાવો.

આંસુ, વિરહ, વ્યથાઓ, સપનાં અને નિઃસાસા,
છે આપણી જ વાતો ને આપણા બનાવો.

છોને વસંત માણો, એક કામ પૂરું કરજો,
ફૂલોને પાનખરમાં જઈને તમે હસાવો.

– દિલીપ રાવલ

આજકાલ વાંચવા મળે છે એના કરતાં સાવ નોખો જ અંદાજે-બયાં લઈને આવતી ગઝલ… બધા જ શેર કેવા મજાના!

4 Comments »

  1. સુરેશ જાની said,

    November 16, 2017 @ 7:42 am

    પાનખરમાં પહોંચી ગયેલા આ જણને પાનખરમાં હસવા, હસાવવાની વાત ગમી.

  2. SARYU PARIKH said,

    November 17, 2017 @ 9:17 am

    વાહ! મજાની રચના.
    ના કંઈ નવું નથી અહીં, છે એના એ બનાવો,
    ઇચ્છાના વૃક્ષ કાપો, ઇચ્છાના વૃક્ષ વાવો….
    સરયૂ પરીખ

  3. સુનીલ શાહ said,

    November 17, 2017 @ 9:36 am

    વાહ…ખૂબ સુંદર અભિવ્યક્તિ

  4. Jayendra Thakar said,

    November 17, 2017 @ 10:14 pm

    ફૂલોને પાનખરમાં જઈને તમે હસાવો. મોસમ છે પાનખરની…હસાવું તો એ ખરતા પાનને,
    ફુલોતો સદાબહાર છે!

RSS feed for comments on this post · TrackBack URI

Leave a Comment