પથ્થરો સાથે ય વાતો શક્ય છે પણ,
શોધ, ભાષા તું પ્રથમ શબ્દો વગરની.
રમેશ પારેખ

(પાનબાઈ) – મનોજ ખંડેરિયા

ઝાકળના જેવી જાતને ધારી છે પાનબાઈ;
ફૂલો ઉપરથી એને નિતારી છે પાનબાઈ.

જેવી છે એવી વાત સ્વીકારી છે પાનબાઈ;
ઓછી કરી ન કે ન વધારી છે પાનબાઈ.

બાજી બગડતી થોડી સુધારી છે પાનબાઈ;
આવડતું એવી ગૂંચ સંવારી છે પાનબાઈ.

જાણી લો પાછી કોક દિવસ આપવાની છે,
આ જિંદગી તો એવી ઉધારી છે પાનબાઈ.

પકડાવો એને પાસા પિયુજીના નામના,
આ જીવ નાતે-જાતે જુગારી છે પાનબાઈ.

સમજીવિચારી મેળવો તુંબડાના તારતાર,
આ શ્વાસ સાવ ઝીણી સિતારી છે પાનબાઈ.

મૂક્યો અલખની લ્હેર્યું ઉપર જેણે પગ જરા
એની પવનથી તેજ સવારી છે પાનબાઈ.

– મનોજ ખંડેરિયા

કવિશ્રી મનોજ ખંડેરિયાનો આજે ૭૪મો જન્મદિવસ છે. સોશ્યલ મિડિયાઝ એમની જૂની ને જાણીતી રચનાઓથી અભરે ભરાઈ રહ્યાં છે એવામાં રાજકોટથી કવિમિત્ર શ્રી સંજુ વાળાએ ઇન્ટરનેટ પર ક્યાંય ન મળે એવી આ મજાની ગઝલ લયસ્તરો માટે મોકલી આપી. આભાર, સંજુભાઈ.

ગંગાસતીએ પુત્રવધૂ (?) પાનબાઈને સંબોધીને અમર ભક્તિપદ આપણને આપ્યાં. મનોજભાઈ ગંગાસતીમાં કાયાપ્રવેશ કરી આજની પાનબાઈ-જાનબાઈને સંબોધીને કેટલીક ગઝલ આપી ગયા, એમાંની આ એક. આખી ગઝલ સંઘેડાઉતાર. એક-એક શેર વીજળીના ચમકારે મોતીડાં પરોવવા જેવા પાણીદાર…

5 Comments »

  1. સંજુ વાળા said,

    July 6, 2017 @ 4:41 am

    વાહ કવિ.

    વિવેકજી અહીં મઝા એ છે કે આ દોઢસોએક વર્ષના સમયને કવિ ઓગાળી નાખે છે. ગંગાસતીનું પાનબાઈને સંબોધન એ સતમાર્ગની સ્થાપના માટેનું હતું. અહીં કવિ જાત પરિચયના હેતુ માટે પાનબાઈ સાથે સંવાદ કરે છે સંબોધન રીતિએ. પેલામાં કથન એ સાધન હતું અહીં કથન સાધ્ય છે. નરી નમણી ઉક્તિઓનો આ વૈભવ આપણી ભાષાના કેટલાક ઘરેણાં પૈકીનો.
    મેં તો આગળી ચીંધી. કવિ તરફના ઋણભાવના કારણે. વંદન કવિને.

  2. ketan yajnik said,

    July 6, 2017 @ 7:33 am

    જન્મદિવસની શુભેચ્છાઓ મનોજભાઈ

  3. ratnesh algotar said,

    July 6, 2017 @ 7:53 am

    વાહ

  4. shivani shah said,

    July 6, 2017 @ 5:09 pm

    ખોૂબ સરસ ગઝલ!
    કવિશ્રિને જન્મ દિવસનિ શુભ કામનાઓ !

  5. જગદીશ કરંગીયા ‘સમય’ said,

    July 6, 2017 @ 11:08 pm

    @ મનોજ ખંડેરિયા – વાહ કવિ વાહ! એકથેી એક શેર ચડિયાતા.

    “જેવી છે એવી વાત સ્વીકારી છે પાનબાઈ;
    ઓછી કરી ન કે ન વધારી છે પાનબાઈ.

    બાજી બગડતી થોડી સુધારી છે પાનબાઈ;
    આવડતું એવી ગૂંચ સંવારી છે પાનબાઈ.

    જાણી લો પાછી કોક દિવસ આપવાની છે,
    આ જિંદગી તો એવી ઉધારી છે પાનબાઈ.”

    @ લયસ્તરો -આભાર.
    જય ભારત.
    —————
    Jagdish Karangiya ‘Samay’
    https://jagdishkarangiya.wordpress.com

RSS feed for comments on this post · TrackBack URI

Leave a Comment