આ ફુલ્લકુસુમિત તેજ રહો યાવચ્ચંદ્રદિવાકરૌ,
આ સ્મિત પણ એનું એ જ રહો યાવચ્ચંદ્રદિવાકરૌ.
સંગાથના સુખની બાબતમાં બીજું કશું ખપતું જ નથી-
‘હતું’-‘હશે’ નહીં, ‘છે જ’ રહો યાવચ્ચંદ્રદિવાકરૌ.
- વિવેક મનહર ટેલર

(તમને ગમે તો પહેરો) – હરીશ મીનાશ્રુ

ઝાકળ ન તાણે તંબુ, સાધુ ન ડારે ડેરો
સુરભિ સદા અજન્મા, વાયુ ફરે ન ફેરો

સપડાઈ ગયા છે સૌ સગપણ અને સમજણમાં
ઘર ઘર મટીને સહસા થઈ જાય સખત ઘેરો

પડછાયો પગ તળેથી છટકીને ક્યાં જવાનો ?
ધોળે દહાડે શાને સૂરજનો ચોકીપહેરો ?

દરિયા કનેથી ઈંડાં માગે છે જ્યાં ટિટોડી
મોતી બધાંય મીંડાં, લજ્જિત બધીય લહેરો

નગરી ઉજેણી, એમાં આ શબ્દનું સિંહાસન
હું બેસવા જઉં ત્યાં પૂતળી પુકારે ઠહેરો

શંકાનું એક ટીપું, મનની મટોડી કાળી
ભાષાનો ભેદ તસ્કર કરતાં ગુપત ને ઘેરો

હું બરતરફ કરું છું શાહીનો ચન્દ્ર નભમાં
આ વાત પર અમાસે મારી દીધો છે શેરો

ખખડ્યા કરે છે અંદર ઈશ્વરની એ ઈમારત
નકશામાં કોણ કરતું, ખંડેરનો ઉમેરો ?

કંપે છે એકસરખાં ધડ ને અરીસા સૌના
ડરને અને ઈચ્છાને છે એકસરખો ચહેરો

કાચી કબરના માપે મેરાઈએ સીવ્યો છે
માટીનો એક ડગલો, તમને ગમે તો પહેરો

– હરીશ મીનાશ્રુ

કેટલાક છંદદોષને નજરઅંદાજ કરીએ તો મજાની દ્વિખંડી ગઝલ. પ્રાચીન ગુજરાતીના દોહા કે સુભાષિતો સાંભળતા હોઈએ એવી ગેરુઆ બાનીની ગઝલ. બધા જ શેર મનનીય થયા છે.

9 Comments »

  1. poonam said,

    April 22, 2017 @ 4:46 AM

    કંપે છે એકસરખાં ધડ ને અરીસા સૌના
    ડરને અને ઈચ્છાને છે એકસરખો ચહેરો..
    – હરીશ મીનાશ્રુ – WAAH !

  2. નિનાદ અધ્યારુ said,

    April 22, 2017 @ 4:46 AM

    હું બરતરફ કરું છું શાહીનો ચન્દ્ર નભમાં,
    આ વાત પર અમાસે મારી દીધો છે શેરો.

    દાદુ …!

  3. ઢીંમર દિવેન said,

    April 22, 2017 @ 5:00 AM

    મત્લા બઉં જ ધારદાર

  4. Gaurang Thaket said,

    April 22, 2017 @ 5:20 AM

    વાહ વાહ ખૂબ સરસ…

  5. Maheshchandra Naik said,

    April 22, 2017 @ 10:52 PM

    સરસ…….બધા જ શેર મનભાવન…………

  6. Rakesh Thakkar, Vapi said,

    April 23, 2017 @ 1:37 AM

    વાહ!
    કંપે છે એકસરખાં ધડ ને અરીસા સૌના
    ડરને અને ઈચ્છાને છે એકસરખો ચહેરો

  7. Pravin Shah said,

    April 23, 2017 @ 6:09 AM

    માટીનો એક ડગલો, તમને ગમે તો પહેરો… એ તો જે આપે તે જ પહેરવો પડે છે.

    સુન્દર બાનીમાં લખાએલ ગઝલ

  8. હેમંત જોષી said,

    April 24, 2017 @ 10:22 PM

    ઝાકળ ન તાણે તંબુ, સાધુ ન ડારે ડેરો
    સુરભિ સદા અજન્મા, વાયુ ફરે ન ફેરો

    અદભૂત સવાર સુધરી ગઈ.

  9. લલિત ત્રિવેદી said,

    May 15, 2017 @ 2:31 PM

    અદભુત

RSS feed for comments on this post · TrackBack URI

Leave a Comment