એક રઝળતી ક્ષણ મને વળગી પડી,
છે ટચૂકડી તોય બહુ અઘરી પડી.

બંધ આંખોમાં મેં કર્યું ડોકિયું,
ઊંઘ જે કાચી હતી, વણસી પડી.
બિનિતા પુરોહિત

(સરહદ વટાવીને) – ગૌરાંગ ઠાકર

વિચારોને વમળમાં આજ આવ્યો છું ડુબાવીને,
કિનારે એમ લાવ્યો જાત મારી હું બચાવીને.

ખરે છે ડાળડાળેથી હવે વળગણનાં પર્ણો દોસ્ત,
જરા મેં જોઈ લીધું ઊર્ધ્વમૂળે વૃક્ષ વાવીને.

પ્રતીક્ષાની આ પીડા દ્વારને ઓછી નથી હોતી,
હવા કરતી રહે છે છેડતી સાંકળ હલાવીને.

તમારા ઘરનાં રસ્તેથી પ્રવેશું છું હું અનહદમાં,
અહીં તેથી હું આવ્યો છું બધી સરહદ વટાવીને.

બધું આ બ્હારથી તો ઠીક છે બદલાવ તું ભીતર,
અરીસો આખરે બોલી ઊઠ્યો છે બ્હાર આવીને .

– ગૌરાંગ ઠાકર

વિચારની દીવાલ ઓળંગવાના પ્રયત્નો આદિકાળથી મનુષ્ય કરતો આવ્યો છે. ધ્યાન ધરવાની બહુ જાણીતી પદ્ધતિ પોતાની જાતને વિચારોથી વેગળી કરવાની, પોતાના જ વિચારોને બાહ્ય પદાર્થ તરીકે સાક્ષીભાવે જોતાં શીખવાનું અને એમ નિર્વિચાર થવું એ છે. વિચારોને વમળમાં ડૂબાડી દઈ શકીએ તો જાત આ ભવસાગર તરી જાય.  આમ તો બધા જ શેર ધ્યાનાર્હ થયા છે પણ પ્રિયજનના ઘરના રસ્તેથી અનહદમાં પ્રવેશવાની કેફિયત ખૂબ ઊંડી વાત લઈને આવે છે. હદ વટાવ્યા વિના પ્રેમ થતો નથી. બધી જ સરહદ વટાવી દઈને જ્યારે તમે તમારું અસ્તિત્વ સામી વ્યક્તિમાં ઓગાળી દો છો, સામી વ્યક્તિમાં પ્રવેશો છો ત્યારે અનહદની પ્રાપ્તિ થાય છે.

 

6 Comments »

  1. poonam said,

    January 19, 2017 @ 2:38 AM

    બધું આ બ્હારથી તો ઠીક છે બદલાવ તું ભીતર,
    અરીસો આખરે બોલી ઊઠ્યો છે બ્હાર આવીને .
    – ગૌરાંગ ઠાકર My Fvrt..

  2. chandresh said,

    January 19, 2017 @ 3:54 AM

    વિચારોને વમળમાં આજ આવ્યો છું ડુબાવીને,
    કિનારે એમ લાવ્યો જાત મારી હું બચાવીને.
    સરસ

  3. KETAN YAJNIK said,

    January 19, 2017 @ 6:18 AM

    દુભનું દૂધ ને પાણી નું પાણી થઇ ગયું।આ પર તમારા ને પેલે પાર ?
    સરસ ગઝલ

  4. Gaurang Thaker said,

    January 19, 2017 @ 8:04 AM

    Thank you vivekbhai and laystaro…

  5. Rakesh Thakkar, Vapi said,

    January 19, 2017 @ 11:57 AM

    બધું આ બ્હારથી તો ઠીક છે બદલાવ તું ભીતર,
    અરીસો આખરે બોલી ઊઠ્યો છે બ્હાર આવીને .
    Nice Gazal

  6. Maheshchandra Naik said,

    January 19, 2017 @ 4:52 PM

    સરસ ગઝલ,
    બધું આ બહારથી તો ઠીક છે બદલાવ તું ભીતર,
    અરીસો આખરે બોલી ઊઠ્યો છે બહાર આવીને….
    જાત સાથે વાત કરવાની અનોખી રજુઆત્…….કવિશ્રી ને અભિનદન,લયસ્તરો નો આભાર્….

RSS feed for comments on this post · TrackBack URI

Leave a Comment