યાદગાર મુક્તકો : ૧૦ : અમૃત ઘાયલ
મુક્તકોની મહેફિલ હોય અને મુક્તકોના રાજા જ હાજર ન હોય તો કેમ ચાલે? બાઅદબ, બામુલાહિજા હોંશિયાર… શહીદ-એ-ગઝલ અમૃત ઘાયલની સવારી આવી પહોંચી છે…
બાજુમાં ગુલ અને નજરમાં બહાર,
હાથમાં જામ, આંખડીમાં ખુમાર;
આવી પહોંચી સવારી ઘાયલની
બાઅદબ, બામુલાહિજા, હુશિયાર…
આંખમાં ખુમાર લઈ આવી પહોંચેલા આ શાયર પોતાની શાયરીની તાકાતથી સુપેરે વાકેફ છે. એ જાણે છે કે કવિતા મડદાને પણ બેઠા કરી શકે છે.
અમૃતથી હોઠ સહુના એઠા કરી શકું છું,
મૃત્યુના હાથ પળમાં હેઠા કરી શકું છું;
આ મારી શાયરી તો સંજીવની છે ‘ઘાયલ’
શાયર છું, પાળિયાને બેઠા કરી શકું છું.
તાકાત હોવી અને તાકાતથી માહિતગાર પણ હોવું આ બેવડું સદભાગ્ય તો હનુમાનને પણ હાથ નહોતું. આ માત્ર શાયરના અને શાયરીના જ વશની વાત છે. અને ઘાયલ તો ન માત્ર પોતાની શક્તિથી માહિતગાર છે, એમના પોતાની જિંદગી વિશેના વિચારો પણ સ્પષ્ટ છે…
જીવન જેવું જીવું છું, એવું કાગળ પર ઉતારું છું;
ઉતારું છું, પછી થોડું ઘણું એને મઠારું છું.
તફાવત એ જ છે, તારા અને મારા વિષે, જાહિદ!
વિચારીને તું જીવે છે, હું જીવીને વિચારું છું.
ભલભલા ચમરબંધીનેય એ સાચું કહેતાં અચકાતા નહીં. સૌરાષ્ટ્ર જ્યારે અલગ રાજ્ય હતું અને ઉછંગરાય ઢેબર મુખ્યમંત્રી હતા મુખ્યમંત્રીશ્રી તથા ધારાસભ્યો સમક્ષ કાવ્યપઠન કરવા જવાનું હતું પણ પૂર્વસંમતિ લેવામાં આવી ન હોવાના કારણે ઘાયલે નકાર પકડાવ્યો. સરકારી નોકર હોવાની ચીમકી આપવામાં આવી ત્યારે ઘાયલે કહ્યું, ‘ભટ્ટ અમૃતલાલ લાલજીભાઈ ભલે સરકારી નોકર હોય, ઘાયલ નથી.’ શ્રી જવાહરલાલ નહેરુ વડાપ્રધાન હતા ત્યારે એમના શાસનથી અસંતોષ હોવાના કારણે ઘાયલે એમના મોઢા પર જે મુક્તક સંભળાવ્યા હતા એમાંનું એક:
થોડો ઝાઝો હિસાબ તો આપો,
ખોટો સાચો જવાબ તો આપો
બાગમાં ભાગ છે અમારો પણ
એક વાસી ગુલાબ તો આપો !
– અમૃત ‘ઘાયલ’
Rakesh Thakkar, Vapi said,
December 20, 2016 @ 2:19 AM
સુંદર મુક્તકો અને તેની સમજ માટે વિવેકભાઇનો આભાર!
Naren said,
December 20, 2016 @ 4:04 AM
શાનદાર રસાનુવાદ
KETAN YAJNIK said,
December 20, 2016 @ 4:14 AM
બાઅદબ, બામુલાહિજા, હુશિયાર…
KeTan PaTel said,
January 1, 2017 @ 11:59 PM
Absolutely stunning!!
“Zindagi Etle zindadili” E vaat to ghayal saheb ne vanchiye to j samaji sakay….
Jyare jyare emni rachnao vanchu Etle divas sudhari jaay ek navi j prerana Ane khumari Made…
Zamano jo hoy kado naag to huy madaari 6u,
Pa6adu udata pankhi ne evu hu shikari 6u..”
Thanks to you for posting such an awesome literacy works over here.. being an avid reader i wandered Online Alot but never find such a worthy collection anywhere..
A Big Big thanks to whole Team of laystar- you people lighted up my scattered&burnt poetic spark. Every morning i wake up and take a look of it so that i can gain some positivity and audacity to challenge advent moments..
KEEP posting beautiful work from gujarati literature so that more and more people comes to know about it.
SAMIR SHAH said,
January 7, 2021 @ 10:40 AM
થોડો ઝાઝો હિસાબ તો આપો,
ખોટો સાચો જવાબ તો આપો
બાગમાં ભાગ છે અમારો પણ
એક વાસી ગુલાબ તો આપો !
can you please publish the entire gazal. Thanks.