વિકલ્પ નથી – મનોજ ખંડેરિયા
બધાનો હોઈ શકે, સત્યનો વિકલ્પ નથી;
ગ્રહોની વાત નથી, સૂર્યનો વિકલ્પ નથી.
પાતાળે શાખ વધી, મૂળ સર્વ આકાશે,
અમારા બાગના આ વૃક્ષનો વિકલ્પ નથી.
હજારો મળશે મયૂરાસનો કે સિંહાસન,
નયનનાં આંસુજડિત તખ્તનો વિકલ્પ નથી.
લડી જ લેવું રહ્યું મારી સાથે ખુદ મારે,
હવે તો દોસ્ત, આ સંઘર્ષનો વિકલ્પ નથી
કપાય કે ન બળે, ના ભીનો વા થાય જૂનો,
કવિનો શબ્દ છે, એ શબ્દનો વિકલ્પ નથી.
પ્રવાહી અન્ય ન ચાલે ગઝલની રગરગમાં,
જરૂરી રક્ત છે ને રક્તનો વિકલ્પ નથી.
– મનોજ ખંડેરિયા
નિનાદ અધ્યારુ said,
July 12, 2016 @ 12:45 AM
કપાય કે ન બળે, ના ભીનો વા થાય જૂનો,
કવિનો શબ્દ છે, એ શબ્દનો કોઇ વિકલ્પ નથી.
કવિનો શબ્દ છે ….!! એનો વિકલ્પ કેવળ કવિ પાસે જ છે …!
KETAN YAJNIK said,
July 12, 2016 @ 4:09 AM
ખાંડણિયામાં માથા રામ વિકલ્પની વાત જ ક્યાં?
Chintan Acharya said,
July 12, 2016 @ 5:32 AM
લડી જ લેવું રહ્યું મારી સાથે ખુદ મારે,
હવે તો દોસ્ત, આ સંઘર્ષનો વિકલ્પ નથ
ખુબ સુન્દર !
વિવેક said,
July 13, 2016 @ 2:28 AM
ખૂબ જાણીતી ગઝલ… આખરી બે શેર તો જાણે કવિઓ માટેની ગીતા !!!
Devika Dhruva said,
July 13, 2016 @ 5:13 PM
આહ અને વાહ્…