સ્પર્શ કરીશું સહેજ સરીખો,
છેક ભીતરે ઝાંકી લેશું.
અલપઝલપ બસ એક નજરમાં,
ભવભવનું પણ ભાખી લેશું.
વંચિત કુકમાવાલા

ગઝલ – ટેરેન્સ જાની ‘સાહેબ’

ક્યાં પડી છે સવાર વરસોથી
મિત્ર ! છે અંધકાર વરસોથી

ઇશના માટે તો હતો એક જ
અહીં તો છે શુક્રવાર વરસોથી

પાનખરનો રૂઆબ ત્યાં પણ છે
જ્યાં વસે છે બહાર વરસોથી

તોય મક્તા સુધી નથી પહોંચ્યો
છું કલમ પર સવાર વરસોથી

દિલમાં છે ગેરકાયદેસરનો
નહિ જતો આ જનાર વરસોથી

જિંદગી જેવો શ્રાપ આપીને
એ ખુદા છે ફરાર વરસોથી

– ટેરેન્સ જાની ‘સાહેબ’

એક એક શેર પાણીદાર… વરસોથી સવાર પડી જ નથી. આપણે રોજ ઊઠીએ છીએ પણ જાગતા નથી. ઇશુ ખ્રિસ્તના જીવનમાં તો શૂળી પર ચડવું પડ્યું એવો એક જ શુક્રવાર હતો પણ અહીં તો વરસોથી નિતાંત શુક્રવાર, શૂળી સિવાય બીજું કશું જ નથી. મક્તા એટલે ગઝલનો આખરી શેર. આખરી મુકામ.કયો સાચો કવિ જિંદગીમાં કવિતાના આખરી મુકામ પર પહોંચી શક્યો છે? મંઝિલનો સંતોષ થવાની ઘડી જ મુસાફરી ખતમ થવાની ઘડી છે એટલે જ સાહેબ વરસોથી કલમ પર સવાર છે પણ મક્તા હજી હાથ આવતો નથી. ગેરકાયદેસર વસવાટવાળો શેર પણ માસ્ટર સ્ટ્રોક. સાહેબને જાણે મૃત્યુનો પૂર્વાભાસ કેમ ન થઈ ગયો હોય એમ એની ગઝલોમાં જીવન અને મૃત્યુની વાત અવારનવાર આવતી જ રહે છે.. છેલ્લો શેર જુઓ… અને ફરાર ખુદાને સવાલ કરો… શા માટે? ૨૭ વરસના ઉમદા શાયરની એને શી જરૂર પડી ?

6 Comments »

  1. Rajnikant Vyas said,

    February 13, 2015 @ 3:16 am

    ખૂબ સુન્દર ગઝલ. ગુજરાતી ગઝલ વિશ્વમા ‘સાહેબ’ ની ખોટ બહુ સાલશે.

  2. Hardik Vora said,

    February 13, 2015 @ 3:28 am

    વાહ સાહેબ ….

  3. Girishparikh's Blog said,

    February 13, 2015 @ 6:31 pm

    […] નોંધઃ ટેરેન્સ જાની ‘સાહેબ’ની ગઝલઃ http://layastaro.com/?p=12558 એના શેર તોય મક્તા સુધી નથી પહોંચ્યો […]

  4. સુનીલ શાહ said,

    February 14, 2015 @ 1:43 am

    ‘સાહેબ’ની સુંદર ગઝલ..
    એમનો જ એક શેર…
    શ્વાસ આ ‘‘સાહેબ’’ ત્યાં પણ લે છે,
    જ્યાં હવા જેવું કશું પણ નથી.

  5. mehul patel ish said,

    February 14, 2015 @ 3:34 am

    વાહ સાહેબ ! ગઝલો થકી હમેશા જીવશો
    સુંદર ગઝલ !

  6. Harshad said,

    February 14, 2015 @ 10:33 am

    Beautiful Gazal. Loved and like this Gazal.

RSS feed for comments on this post · TrackBack URI

Leave a Comment