ટૂંકી ટચરક વાત, કબીરા,
લાંબી પડશે રાત, કબીરા.

જીવ હજીએ ઝભ્ભામાં છે,
ફાટી ગઈ છે જાત, કબીરા.

ચંદ્રેશ મકવાણા ‘નારાજ’

ભીડમાં – ભગવતીકુમાર શર્મા

દરિયાની ભીડમાં અને મોજાંની ભીડમાં;
મોતી મને મળ્યાં નહીં છીપલાંની ભીડમાં.

ઝીણો ઉજાસ ક્યાં છે ઝગારાની ભીડમાં ?
તમને ભૂલી ગયો છું હું ઈચ્છાની ભીડમાં.

પકડીને મારી આંગળી હું નીકળ્યો હતો;
ખોવાઈ ખુદ ગયો છું તમાશાની ભીડમાં.

શોધી રહ્યો છું શબ્દ અનાઘ્રાત પુષ્પ શો;
લાધ્યો નથી મને એ કુહાડાની ભીડમાં.

વૈશાખની બપોરે ઉઘાડાં ચરણ લઈ;
જોયા ન છાંયડાઓ મેં રસ્તાની ભીડમાં.

પહોંચી શક્યો ન વાવના તળિયા સુધી કદી;
અટવાઈ હું ગયો છું પગથિયાંની ભીડમાં.

મારી પ્રતીક્ષા ધૂંધળી પડશે નહીં કદી;
કેડી નહીં કળાય ઝરૂખાની ભીડમાં.

-ભગવતીકુમાર શર્મા

પહેલો અને છઠ્ઠો શેર એકસમાન જ નથી લાગતા ??

આખી ગઝલ સશક્ત છે. તમામ શેરમાં એક મધ્યવર્તી વિચાર પ્રવર્તે છે. તમામ distractions ને જ્યાં સુધી તિલાંજલિ નહીં અપાય ત્યાં સુધી મોતી મળવાનું નથી.

6 Comments »

  1. narendrasinh said,

    July 8, 2014 @ 3:29 am

    મારી પ્રતીક્ષા ધૂંધળી પડશે નહીં કદી;
    કેડી નહીં કળાય ઝરૂખાની ભીડમાં. ખુબ સુન્દર ભાવ વિભોર ગઝલ્

  2. lata j hirani said,

    July 8, 2014 @ 5:27 am

    saras..

  3. perpoto said,

    July 8, 2014 @ 11:52 am

    દરિયાની ભીડમાં અને મોજાંની ભીડમાં;
    મોતી મને મળ્યાં નહીં છીપલાંની ભીડમાં.

    સરસ ઉઘાડ.

    કોણ શોધે છે
    આ ભીડમાં,અટુલી
    ઝાંપે કબરો

  4. ધવલ said,

    July 8, 2014 @ 2:53 pm

    ઝીણો ઉજાસ ક્યાં છે ઝગારાની ભીડમાં ?
    તમને ભૂલી ગયો છું હું ઈચ્છાની ભીડમાં.

    સરસ વાત !

  5. Devika Dhruva said,

    July 10, 2014 @ 2:04 pm

    મનને માંજીને એકદમ ચકમકાવતી ગઝલ.
    સાચી વાત છે…ખોવાઈ ગયાં છે માણસો એકલતાની ભીડમાં…
    ઝીણો ઉજાસ ક્યાં છે ઝગારાની ભીડમાં ?

  6. Yogesh Shukla said,

    July 12, 2014 @ 3:59 pm

    દર વખત ની જેમ સારી ગઝલ વાંચવા મળી ,,,,,

RSS feed for comments on this post · TrackBack URI

Leave a Comment