નાનપણમાં – રમેશ પારેખ
નાનપણમાં બોરાં વીણવા જતા.
કાતરા પણ વીણતા.
કો’કની વાડીમાં ઘૂસી ચીભડાં ચોરતા.
ટેટા પાડતા.
બધા ભાઇબંધોપોતાનાં ખિસ્સામાંથી
ઢગલી કરતા ને ભાગ પાડતા-
-આ ભાગ ટીંકુનો.
-આ ભાગ દીપુનો.
-આ ભાગ ભનિયાનો, કનિયાનો…
છેવટે એક વધારાની ઢગલી કરી કહેતા-
‘આ ભાગ ભગવાનનો !’
સૌ પોતપોતાની ઢગલી
ખિસ્સામાં ભરતા,
ને ભગવાનની ઢગલી ત્યાં જ મૂકી
રમવા દોડી જતા.
ભગવાન રાતે આવે, છાનામાના
ને પોતાનો ભાગ ખાઇ જાય-એમ અમે કહેતા.
પછી મોટા થયા.
બે હાથે ઘણું ય ભેગું કર્યું ;
ભાગ પાડ્યા-ઘરના, ઘરવખરીના,
ગાય, ભેંસ, બકરીના.
અને ભગવાનનો ભાગ જુદો કાઢ્યો ?
રબીશ ! ભગવાનનો ભાગ ?
ભગવાન તે વળી કઇ ચીજ છે ?
સુખ, ઉમંગ, સપનાં, સગાઇ, પ્રેમ-
હાથમાં ઘણું ઘણું આવ્યું…
અચાનક ગઇ કાલે ભગવાન આવ્યા;
કહે : લાવ, મારો ભાગ…
મેં પાનખરની ડાળી જેવા
મારા બે હાથ જોયા- ઉજ્જ્ડ.
એકાદ સુકું તરણું યે નહીં.
શેના ભાગ પાડું ભગવાન સાથે ?
આંખમાં ઝળઝળિયાં આવ્યાં,
તે અડધાં ઝળઝળિયાં આપ્યાં ભગવાનને.
વાહ !- કહી ભગવાન મને અડ્યા,
ખભે હાથ મૂક્યો,
મારી ઉજ્જ્ડતાને પંપાળી,
મારા ખાલીપાને ભરી દીધો અજાણ્યા મંત્રથી.
તેણે પૂછ્યું : ‘કેટલા વરસનો થયો તું’
‘પચાસનો’ હું બોલ્યો
’અચ્છા…’ ભગવાન બોલ્યા : ‘૧૦૦ માંથી
અડધાં તો તેં ખરચી નાખ્યાં…
હવે લાવ મારો ભાગ !’
ને મેં બાકીનાં પચાસ વરસ
ટપ્પ દઇને મૂકી દીધાં ભગવાનના હાથમાં !
ભગવાન છાનામાના રાતે એનો ભાગ ખાય.
હું હવે તો ભગવાનનો ભાગ બની પડ્યો છું અહીં.
જોઉં છું રાહ-
કે ક્યારે રાત પડે
ને ક્યારે આવે છાનામાના ભગવાન
ને ક્યારે આરોગે ભાગ બનેલા મને
ને ક્યારે હું ભગવાનનાં મોંમાં ઓગળતો ઓગળતો…
– રમેશ પારેખ
શું આલેખન છે !!!! અદભૂત !!
himanshu vyas said,
December 30, 2013 @ 6:15 AM
અદભુત કાવ્ય રચના ! ખુબજ સચોટ !
ravindra Sankalia said,
December 30, 2013 @ 7:10 AM
ભગવાનના મનમા ઓગળતો ઓગળતો …… પછી આગળ શુ? ઓગળ્અતો ઓગળ્અતો ભગવાનનો બની ગયો?
perpoto said,
December 30, 2013 @ 10:06 AM
ખુબ જ સુંદર કાવ્ય,પ્રામાણિક અને અવલોકનકારી…
કોઇકવાર એવું જણાય છે,માણસ ફુટતો હોય છે,ફુગ્ગા જેવો અચાનક,ઓગળવાનાં સ્વપ્નો જોતો જોતો…
ઝાંકળ હતું
પરોઢે જોતું સ્વપ્નાં
હેં! ઓગળવાના
rasikbhai said,
December 30, 2013 @ 11:21 AM
ભગાવાન નો ભાગ ઈ જિન્દગિ નો ભાગ્ વાહ બહુ સરસ
ધવલ said,
December 30, 2013 @ 1:18 PM
વાહ ! સલામ !
Jayshree said,
December 30, 2013 @ 6:24 PM
આ જ કવિતા – કવિ શ્રી ના પોતાના અવાજમાં સાંભળવાનો એક અનેરો આનંદ છે.
http://tahuko.com/?p=9788
harnish said,
December 31, 2013 @ 12:00 AM
આ કાવ્યના તો કોઈપણ જાતના વખાણ પણ ઓછા પડે ! માસ્ટરપીસ.
Sangita dave said,
December 31, 2013 @ 12:25 AM
Balpan ni nikhalasta ane motpan ni naffatata nu sachot alekhan
Sandhya Bhatt said,
December 31, 2013 @ 10:49 AM
અદભુત…
વિવેક said,
January 1, 2014 @ 1:52 AM
સુંદર કવિતા…
Shah Pravinchandra Kasturchand said,
January 4, 2014 @ 9:47 PM
માળા ફેરવતા ફેરવતા ભગવાનના પડખામાં બેઠો હોવાનો ભાસ થઈ ગયો.